افضل اجهزة اللاب نوب

Admin عدد المساهمات : 115 تاريخ التسجيل : 24/07/2014

اهم المواصفات او اساسات اى لاب توب والمواصفات اللى يركز عليها اى واحد هيشترى هى : البروسيسور والرامات وكارت الشاشة والهارد والحاجات التانية المتبقية كلها ليها حلول ...

1 : البروسيسور ...

البروسيسور هو حجر الاساس فى اللاب توب لكن انا هديك ابسط المعلومات اللى تخليك تعرف تقارن بين البروسيسور فى جهازين وتعرف انه افضلهم ...

تقاس قوة البروسيسور بحاجة اسمها الكاش .. كل ما كان عدد الكاشات اللى بيديه البروسيسور اكتر كل ما كان افضل ... فى بروسيسور زى core i7 ده اعلى بروسيسور نزل لحد دلوقتى وده بيدى 6 ميجا كاش ... بعد كده يجى بعده core i5 وده بيدى 3 ميجا كاش ويجى بعدهم core i3 وبيدى برده 3 ميجا كاش ... طيب هتقولى i5 و i3 زى بعض فى الكاشات لكن ال i5 احدث وافضل وبيفرق عن i3 فى حاجات تانية زى استهلاك الطاقة وحاجات تانية من القبيل ده ... فى بروسيسور core 2 due وده فى انواع منه بتدى 2 ميجا كاش و 3 ميجا كاش وده كان افضل بروسيسور قبل ما يظهر i3 . i5 . i7 لكن لحد دلوقتى ناس بتشتريه مع ان الجداد بيتمتعوا عنه بمزايا افضل ...

فيه بروسيسورات اخرى زى الديول كور والسيليرون وده بتبقى موجودة فى لابات امكانياتها صغيرة ... وفيه بروسيسورات تانية بتتحط فى اللابات المينى ..

طيب وانا بجيب اللاب توب اجيبه فيه انه بروسيسور ؟

طبعا زى ما قولنا ان اهم خطوة هى الميزانية فانت تشوف اذا كانت ميزانيتك تجيب لاب توب فيه بروسيسور i7 يبقى ده افضل بروسيسور ممكن تجيبه وبعد كده تمشى بالترتيب i5 ثم i3 ثم core2due ثم كل الاقى بقى يعتبر واحد وبيتحط فى اللابات المينى واللى امكانياتها ضعيفة اللى بيتراوح سعرها من 2000 الى 2500 جنيه ... ودول بيدوا حوالى 1 ميجا كاش بس

اقل لاب فيه بروسيسور i7 سعره مبيقلش وانا بتكلم فى الفترة ده فى صيف 2010 عن 6800 جنيه ... اما i5 بيبدا من 4500 جنيه ... i3 موجود من فوق ال 3000 بحاجة بسيطة ... core2due موجود برده من 4000 جنيه ..

فيه حاجة بتبقى مكتوبة بجانب اسم البروسيسور زى L2 و L3 ده اختصار Level 2 وطبعا الفروق بين الليفيلات ده صغيرة جدا يعنى متفرقش لكن level 3 هو اقصى ليفل لاى بروسيسور وهتلاقيه هو الشائع ...

بالمعلومات ده انت تقدر تقارن بين البروسيسورات وتبقى عارف ابسط الحاجات الاساسية عنهم اللى تفيدك وانت بتشرى ..

2 : الرامات ...

الرامات زى ما الناس عارفة فكرة عامة عنها انها بتدى سرعة للجهاز ... لكن الرامات ليها وظيفة هامة جدا ... ان لما يكون الجهاز بتاعك راماته كويسة تبدا من 3 او 4 جيجا وعندك بروسيسور i7.i5.i3 .core2due ساعتها كارت الشاشة بيسحب من الرامات ويعلى فيديك كفاءة اعلى فى تشغيل الالعاب ... الرامات سهل تزويدها ... بجانب مواصفات الرامات بيبقى موجود بين قوسين )up to 8 gb ) مثلا يعنى الجهاز ده يقدر يشيل رامات لحد 8 جيجا وده اعلى سعة نزلت لحد دلوقتى فانت ممكن تشترى عادى جهاز 4 جيجا رامات او 3 او اى حاجة وتشوف الجهاز ده بيشيل لحد كام وتزود فى اى وقت ...

النوع الافضل اللى الاحسن تجيب رامات من نوع ddr3 مش ddr2 لانه احدث وافضل وبيدى كفاءة مع كارت الشاشة

3 : الهارد ....

طبعا دلوقتى فىيه هاردات 160 و 260 و 320 و 500 و 640 و 1000 ... لكن الالف ده قليل جدا فى اللابات لكن موجود برده لكن الباقيين كلهم موجودين ... وممكن وانت بتشترى لاب و كان موجود فيه هارد 320 تغيره وتحط هارد 500 وتدفع فرق السعر ...
علشان كده يا جماعة الرامات والهارد من الحاجات اللى محدش بيشيل همها لان ممكن تغييره وتويده فى اى وقت ... لكن طبعا الاساس اللى نهتم بيه البروسيسور وكارت الشاشة

4 : كارت الشاشة ..

كارت الشاشة من اهم الحاجات اللى بيسال عليها اى واحد بيشترى لاب توب ... وهو ده الفرق الوحيد بين اللى استخدامه العاب وجرافيكس واللى استخدامه نت وتصفح واوفيس .... لكن الشئ الاساسى سواء كان استخدامك عادى او جرافيكس لازم يكون البروسيسور و الرامات تجيبهم اعلى حاجة ممكن تسمح بيها ميزانيتك ..

فى 3 انواع من كروت الشاشة intel و nividia geforce و ati .... اذا كان استخدامك عادى يبقى تجيب كارت شاشة انتل لانه مش مخصص للالعاب والجرافيكس ... اما اذا كنت مدمن العاب او شغلك محتاج جرافيكس يبقى شئ اساسى جدا انك تجيب كارت شاشة نيفيديا او ايه تى اى ...

بتلاقى فى مواصفات كارت الشاشة اسم الموديل والسعة بتاعته 512 او اجيجا ... وكمان بتلاقى بيعلى لحد ايه .. يعنى مثلا تلاقى لو الكارت نوعه ATI MOBILITY RADEON HD 4570 تلاقى مكتوب انه 1 جيجا ومع رامات 4 جيجا بيعلى ويبقى 1790 يعنى يقرب من 2 جيجا وهكذا مع جميع كروت ....

برده فى موديلات كتير من النيفيديا و ATI وكل كارت وليه قوته وسعته ولو انت بتقارن بين لابين وعايز تعرف قوة كل كارت وامكانية تشغيله للالعاب ممكن تستخدم الموقع ده : www.notebookcheck.com
او ممكن تحط موضوع هنا فى المنتدى او تكتب سؤالك فى موضوع اسعار اللابتوبات اللى موجود هنا فى القسم ...

6- لقيت لاب امكانياته كويسه وعامل 5000 جنيه ولاب تانى نفس امكانياته وعامل 4500 جنيه ايه السبب ؟

اللاب اللى عامل 5000 جنيه جاى معاه نسخة ويندوز سواء سفن او فيستا والجديد كله سفن ... اما التانى مش جاى معاه ويندوز .. والموضوع ده بيساعد ناس كتير لان ممكن يشترى لاب امكانياته اعلى بسعر ارخص لما يجيب اللاب من غير نسخة ويندوز ويحط هو عليه نسخة ويندوز من عنده

7- ازاى احافظ على البطارية بتاعت اللاب ؟

اولا كل البطاريات اللى موجودة فى معظم اللابات حاليا واحد مفيش فرق بينها والمدة اللى بتقعدها بيبقى على حسب استخدامك يعنى لو فضلت عمال تعمل تصفح وشات البطارية بتقعد اطول من لو لعبت لعبة او شغلت فيلم ....

لو انت من الناس اللى اللاب بيقعد فى البيت كتير جدا وقليل لما تنزل بيه يبقى الافضل انك تشيل البطارية من اللاب وتشتغل عادى على الكهرباء من غير البطارية بس بشرط انك كل اسبوع تحط البطارية وتكون مشحونة وتستعملها لحد اما تفضى وترجع تشحنها وتشيلها ...

كل البطاريات ليها عمر افتراضى ولما اللاب يعدى السنتين معاك بتلاحظ ان البطارية بدات كفاءتها تقل بشكل كبير ..
افضل شركة بتعمل عروض للبطاريات اللى موجودة على لاباتها هى شركة ايسر واخر عرض شفته ليها انها عاملة لاب توب بطاريته بتقعد 7 ساعات والكلام ده صحيح طبعا

8- ايه هى الادوات اللى بستعملها فى تنظيف اللاب ؟

بتروح محل كمبيوتر وتشترى منه كلينر وده عبارة عن بخاخة ترشها على اى قطعة قماش نظيفة وتمسح بيها الشاشة وبعدين بقطعة اخرى ناشفة تمسح بيها وهتلاقى الشاشة فوق الممتاز .. برده فى فرشة صغيرة كده علشان تشيل التراب من بين ازرار اللاب توب والماسافى اللى بين الكيبورد والشاشة ..
وكل ده بيتباع فى علبة ثمنها 10 جنيه من اى محل كمبيوتر

9 - بيقولوا اجهزة اتش بى بتسخن جامد بسرعة يعنى الافضل مشتريهاش ؟

لا طبعا اجهزة اتش بى من افضل الاجهزة وماركة كبيرة وممكن التغلب على مشكلة الحرارة انك تشترى كولر ثمنه 30 جنيه وهو عبارة عن قاعدة بيتحط عليها اللاب توب علشان تبرده وتقلل من درجة الحرارة ... لكن فى ناس كتير شغالة على اتش بى من غير الكولر والجهاز ممتاز ...

10- انا عايز اجهزة تستحمل الشغل والبهدلة ؟ وايه اقل اجهزه فىها عيوب الشاشة الزرقا وكده ؟

الديل والتوشيبا مع بعض وبعدين يجى بعدهم الاتش بى اجهزة بتستحمل كويس جدا وبرده الايسر واللينوفو

كل اللابات بتتصنع طبقا لمعايير معينة وكل اللابات زمان كانت فيها المشاكل ده كتير لكن دلوقتى الصناعة اتطورت وصناعة اللابات تقدمت بشكل كبير وقليل جدا لما تلاقى لاب جديد موديل 2010 او اواخر 2009 فيه العيوب ده ...

Very Happy

شكرا

» تحميل تلاوة :من افضل التلاوات المصرية
» تحميل افضل برامج الحمايه Avg 2015 15.0.5557 Final